E PELE CEERNO ALHAJJI AALI CAAM (ALIW KUME)

 

Ngal natal ko e nder suudu makko 

    So tawi won rewɓe e pittaali mumen e ibiliis ɗe gannduɗen ko ɗe gaño neɗɗo, won jiyaaɓe Allah ruuɗiiɓe geɗe aduna ngam ɗooftaade Allah, jom aduna, jom leydi e asamaan, so gollude jamirooje makko e accude kaɗe makko e gollude sunna Nelaaɗo Allah (Sallallaahu Aleyhi Wasallam). Ɓen ko jiyaaɓe Allah laaɓɓe labaaɓe, ɗowaaɓe faade to Allah, jom yurmeeɗe, wonɓe e laawol pooccingol ɓe Nelaaɗo Allah (Sallallaahu Aleyhi Wasallam) suɓi hono wallooɓe ɗum. E ɓen jiyaaɓe, ina e maɓɓe Ceerno Seydi Alhajji Aali Cam (yo weluuyu Allah won e makko).

 

    Caggal nde o gayni daŋde makko to Ceerno Aliw Ismaayilla Dem to Njaay Kunnda, Ceerno Seydi Alhajji Aali Cam (yo weluuyu Allah won e makko) rutti to leydi Gine Portigaal (Gine Bisaawo hannde) ngam ligganaade diine lislam, gollude sunna e gollinde sunna e wallude renndo ngo e diine mum e hakkilantaagal mum. Jannginoowo hen – bittoowo hen to duɗal jaaɓi haatirde Seek Anta Joob hono Ceerno Abdarahman Ngayde ina facciri ngurndam e golle oo jiyaaɗo Allah e nder deftere makko wootere.

 

    Allah, jom tagoore nde fecci gooto e men kala to jogori wuurde e wattande nguurndam mum.

    E hitaande 1918, Ceerno Seydi Alhajji Aali Cam (yo weluuyu Allah won e makko) siñci e nder diiwan Kolda wuro diine, o innirii ngo Madiina tokaara Madiinatul Munawwar lollirngo e innde Madiina Alhajji. Wuro ngo siñcira ko e lislam e sunna e tijjaniyya e jokkere enɗam.

 

    So tawi a naati e nder galle makko to Madiina Alhajji ɗo, aɗa weltoro e huccidde e suudu makko ndu o wonno. Suudu ndu hucciti koy damal galle oo. E pele makko, en keɓi e ballal Allah naatde e suudu ndu hitaande 2018 taw hawruno ko e siyaara makko.

    Ganndo lislam,  Ceerno Seydi Alhajji Aali Cam (yo weluuyu Allah won e makko) ligganiima Nelaaɗo Allah (Sallallaahu Aleyhi Wasallam) e Seek Ahmed Tijjani Seriif (yo weluuyu Allah won e makko).

    Yo Allah, jom yurmeende oo taasnu en e barke makko! Allahumma Aamiin!

 

Aliw KUME, almuudo dental