19 JUKO 2019 – 19 JUKO 2020 : CEERNO ABDUL ASIS BAH, WONII HITAANDE KO O RUTTI (ALIW KUME)

 

Nedɗo goongirante, tedduɗo, e nguurndam makko, o ligganiima dental ngal, oon woni Ceerno Abdul Asiis Bah (Rta).

Ganndo gooto ne wiyatnoo: “Fayiida o wonaa duuɓi ɗi o wuuri e nguurndam makko. Ko nguurndam ɗam o waɗi e nder duuɓi ɗi o wuuri ɗam”. Taarikh makko ne haawni kono haawaani Allah, sabu hawri ko e sahaaji belɗi maantiniiɗi. Taariikh puɗɗiiɗo 1942, hitaande jibinande makko tawa hawri ko e puɗɗe Daakaa (lulnde alliyaŋkoore rewirteende Allah (Subahaanahu Wa Taala) waɗoore hannde to Abi Sama’uun, 10km wuuro Madiina Gunaas).

Duuɓi ina njaha, e ƴoyre makko heptinaande law e anndude ko waɗate, o halfina njuɓɓudi daakaa. E duuɓi ɗi o jogi njuɓɓudi nde lulnde alliyaŋkoore, o dariima heen darnde tiiɗnde, o gollii heen golle moƴƴe e ñeeñal kaawningal. E sawndo ɗum, ko kanko ardinoo fondasiyoŋ dental daakaa Madiina Gunaas caggal nde Ceerno Alhajji Mohammadu Saydu Bah (Rta) yamirno yo juulɓe ɓe mballe no kajjiri taw ko e kajjungol sunna. E ndeen yamiroore, o darni gollorngal nawoore yimɓe hajju e siyaruuji. Gila 1998, hitaande nde ɗum darna, juulɓe heewɓe ko to fondasiyoŋ ɗoo ndewata ngam timminde farilla joyoɓiijo oo.

Ceerno Abdul Asiis Ceerno (Rta) ko ɓadinooɗo haliifa o hono Ceerno Ahmadu Tijjani Bah (Rta), mawniiko mo faarnoraaki e ndeen innde ; ala o suɓi ko wonnde almuudo Ceerno tan tan, ko ɗum ɓuranimo kadi ko ɗum o joottorii. Ko kanko wonno junngo ñaamo Ceerno e junngo mum nano. Ko kannko joginoo konngol Ceerno, ko koolaaɗo makko. Kadi Ceerno ina hawri e makko e ɗum. Ɗum kisa ko kammbe tato fof woni Ceerno Ahmad Tijjaani e Ceerno Ibun Umar e kanko. Gonndigal maɓɓe ina yooɗi sanne. Ngal gonndigal e ɓadondiral ko yeru wonande ɓen yimɓe yidɓe hawrude.

Ceerno Abdul Asiis wonaa neɗɗo keñiiɗo e golle mum, kala heen geɗel ko jam jam o yahrata hen e tee o yettoyto to faay too, haaju makko ko ko humtoto tan, ɗum ko dokke Allah Subahaanahu Wa Taala. Jamma e ñalawma o wonno ko e darnde e golle dental ngal e tijjaaniyya o e diine o. Ko nedɗo gudditinooɗo, joginooɗo humpito e laamu.

Ko e ɓerɗe amen ngonɗa a yalta.

 

Yo allah yurmomo yaafoomo kanko e maayɓe juulɓe fof !

Yo Nelaaɗo Allah (SAW) won njaatigi makko !

 

Aliw KUME ; almuudo dental

Natal : Abdourahim KAN