MADIINA GUNAAS - KEBLANOGOL DAAKA 2020

To nokku Jagorɗo kalfinaaɗo Fiyakuuji Leydi, batu ngam heblanaade Daakaa 2020 jooɗiima ñande aljuma haŋki 28 colte 2020. 

Joom golle en ɓee njeewtidii e ko nawrata Daakaa paaɗo o yeeso. Ardii jonnde ndee ko jaagorɗo fiyaakuuji leydi ndii hono Aali Nguuy Njaay. E tawtoreede Ceerno Ibun Umaar Ceerno jooɗaniiɗo Ceerno e jonnde ndee kadi udditi jonnde ndee wondude e duwaaw.

E puɗfuɗe batu oo jaagorɗo oo artii no feewi e darnde Ceerno Abdul Asiis Ceerno e Muusaa Bah kam e Abuu Wele.

E nder jonnde hee, jogiiɓe njuɓɓudi lulnde nde, nelaaɓe laamu nguu eko wonaa kamɓe  fof ngarti e toɓɓe keewɗe ɗe nganndu ɗen ko potɗe watteede hakkille no feewi e nde lulnde ndee. 

E nder ɗeen toɓɓe ne heen, Ndiyam, laabi, Mahanteeri, Njeeygu, Safaara, laaɓal, duwaañ, e kisal ekn.

Won ko fotaata laataade e ooɗoo Daakaa payaaɗo ɗuum anndaa ko caggal nde gooto fof arti e ko gollata, ɓe kolliri won ko wawata laataade hikka ko ma mo wuuri tan. 

Ɗuum fof e waade non, jaagorɗo fiyaakuuji leydi ndii deeƴnii hakkillaaji yimɓe yahooɓe nootaade noddaandu Alla ɓee, caggal nde o wii ma o wad hen juŋngo makko e daaka hee, tawi ko e poos makko  so toppitade no golle Daakaa njuɓɓirta sabu ko e haajuuji makko ɗum jeyaa.

Meer o wuro ngoo Alh Saydu Bah, kadi woni gardiiɗo Njuɓɓudi Golle Daakaa artii no feewi e jokkondiral potngal waɗde hakkunde foraas Daakaa e Foorasuuji gonɗi e wuro Madiina ngo ngam yimɓe ɓe mbaawa dañde ndiyam caggal nde daaka saaka. 

E wiidemo « Won nokkuuji e wuro ngo, keɓata ndiyam tan fes». O arti kadi e Nelaaɓe ummiɓe to Galle laamorgo leydi ndii so ɓeydude Caali jamaa Daakaa kii.

Ɓe ngartii nofeewi kadi e paddagol otooji to Manndaa Duwaañ e waktuuji 22 jamma yoo nattu kono Guwernoor Koldaa oo deeƴnii hakkillaaji jogorɓe arde Daakaa ɓee so waylude ɗum ha daaka o yawta.

E siftinde on, Daakaa hikka oo jooɗotoo ko ñande Aset 14 haa Altine 23 Mbooy 2020 to Abii Sama’uuna, 10km hakkunde mum e Madiina Gunaas. E nder Daakaa, waɗetee heen ko dewal Alla.

Aliw KUME, Bologer

Alh. Abuu NJAAY, Horeejo Daakaafm

Aamadu Baro Bah, Jaayndiyaŋke