GOODAL FIILI CEERNO JALAALU DIINE BA LEFOL NGAY

E mawninde ñalawma ɗemɗe ngenndiiji, fedde GOODAL, no wowno wadde hitaande kala, hedaani heen caggal. Ñande 22 colte 2020, fedde nde mawnini ñalawma o to nokku Aamadu Gay to Bopp (Ndakaaru).

Hikka, GOODAL suɓi ko gooto e daraniiɓe ɗemɗe ngenndiiji hono Ceerno Jalaalu Diine Bah mo Madiina Gunaas ngam ruttudemo teddungal. Ɓe piiliimo lefol ngay e yeeso yimɓe ɓe limotaako.

E jonnde hee, kaŋko Ceerno Jalaalu Diine Bah, miñiraaɓe makko ɗiɗo hono Ahmadu Tijjani Barro facciri defte makko nde, Abuu Njaay arti e nguurndam makko gila e jaŋnde makko haa e golle makko e darnde makko. Ɓesngu dental Madiina Gunaas notiima no feewi, ene tawe e maɓɓe Imam Ceerno Siraaji Soh, Ceerno mahmud Dem, Ceerno Barro Ceerno Abdul Asis, Aamadu Tijjani Talla, Muhammadu Siraadji Añ gardiiɗo fedde Gostondiral e Njuɓɓidi Almudɓe Ceerno Muhammadu Saydu Bah, ekn.

Ceerno Jalaalu Diine Bah jom ñalawma o, ko taanum jiyaaɗo Alla ciñcuɗo wuro dettungu Madiina Gunaas ngo hono Ceerno Muhammadu Saydu Bah (Rta). E nder duuɓi 6, taw omo yahre e duuɓi 11, o joofni alquraana to duɗal Ceerno Aadama Ñaŋ to Abi Sam’un (11km e Madiina Gunaas, fudnaange Daaka). E hitaande 1978, o yehi Faas Gunaas to duɗal Ceerno Ahmadu Tijjani Bah ngam jokkoyde jaŋnde. E jaŋnde alŋuraana nde, omo yahdini e mayre jaŋnde pulaar, ɗemngal makko neenaniiwal.

O jaŋngoyi ɗuɗal IFEE to Seek Anta Joob, o naati duɗal CESTI ngam hebleede e jaayniyaŋkagal e ɗemngal pulaar.

Ceernaajo o winndi defte keewɗe e lislam e ɗemngal pulaar. Ene tawe e majje : 40 Hadiis, Batuuji sunna 1 et 2, Tijjaniya, Anndu Diine ma, Al Risaala, Firo Alquraana.

E ɗam nguurndam ;

E darnde makko e lislam taw reewi ko e ɗemngal pulaar ;

E darnde makko e ɗemngal pulaar ;

Omo haanndi e ngol lefol e o araray.

Nde jaloore hollata ko darnde makko e ɗemngal pulaar ne heptina : ko liggontooɗo leñol ngol e wonndude e cagatagal e moƴƴere. Wadde omo anndi ko wadɗi e makko.

Bolok Maabo Jaalo, Daakagunaas, Daakafm, Daakatɓ e denndangal ɓesngu dental Madiina Gunaas fof ene njatta, ne njaarna fedde GOODAL e o araray mo ɓe ndokki gooto e ɓesngu dental ngal.