Ɓataake Aliw KUME faade e Ceerno Abdul Asis BAH (Rta)

     Won innde wonnde e hore am, hakkile am e ɓernde am. Ko nde innde sellunde, fayodinnde, nde korsimmi, innde mantorgal.

Nden innde ko aan, Ceerno Abdul Asis Bah (Rta). Yimɓe ɓe njiɗɗen, korsinɗen yaaɓe to julɗo jaasa natti wonde to ngonanno e o aduna kono eɓe ngonndi e men to ɓerɗe to baŋngeeji kala. Eɗen tinaɓe e nder men. Nedɗo goongiraŋke, tedduɗo, e ngurɗam makko, o ligganima lislam, tijjaniya, dental ngal e julɓe fof.

    Ndeysan! E dow leydi he, eɗen njogino golle kono mayde araniima. A yeki kono aɗa ɓadi. Haysomi muɓɓi gite am, natal ma ene ara e am. Mboɗa siftora jamma to biro fonndasiyo ndo to Boppu-Ndakaaru, wonndude e Siraaji Talla, eɗen njewta e ngurɗam Ceerno Allaji Mohammadu Saydu Ba (Rta) ha teŋti e wuro Madiina Gunaas ngo. Wondema nedɗo pertuɗo, aɗa fammina min waylowaylooji ngurɗam yimɓe e jamanu. Min kaawa sabu e yeeso amen min cikkanno ko nedɗo ngummiɗo e duɗal jaaɓi hatirde mo Seek Anta Joob, wala Oksfor, walla Arwar, e baaɗi noon. Kono ko nedɗo gummiɗo e duɗal Madiina Gunass e Faas Gunass, pinɗo, paamɗo, peertuɗo, ƴoƴƴo, kono ko Ceerno Abdul Asis Bah (Rta). Ko jamma e nder jamma am, dumatoɗo e mijooji am. Haysinno a ruttumi e joomen, ka ballidiɗo, kadi ko njinnoɗa ko koko laatoto e wonndude e ballal Alla, jom yurmeende heerinde.

      Halde nedɗagal ma e semmbe ma wona ko weeɓi kono e seeɗa mo nganndumami o, jaŋngini kam ko heewi e ma. Ganndo goto ne wiyanno: “Fayida o wona duuɓi ɗi o wuuri e ngurndam makko. Ko ngurndam ɗam o waɗi e nder duuɓi ɗi o wuuri ɗam”. Aan noon, ngurndam ma ko nafore heewnde barke: jibineede e hitaande arwaninde e daaka, ruttade e Alla (SWT) to wuro mo Nelaaɗo alla (SAW) yi’i aduna, taw aɗa woni e tottude falirla hajju. Eskey!

 Ka nedɗo tedduɗo, jaŋkiniɗo, jokkondiriyaŋke mo sikka ala e mum. Ada yiɗi ngenndi ma, ka miijiyaŋke, jom kakkile, ko aan wonno seneral e kapiteen dental ngal. Ka mantorgal, mo darnde mum ñemmbate ha teŋti e wonande minen sukaaɓe ɓe.

     So daaka, so hajju, walla e saha dental ngal godɗi, hakkile am ne rutto e ma. To aljanna, ala telefon kono mo e ne yiɗi jokkondirde e ma, so ndaari golle ma nde tan, o nanete sabu won ko nde kalata, won ko njertinta nedɗo e o aduna. Mayɓe ɓe noon, ɓe ngoni mayɓe tan ko so tawi wurɓe ɓe njejjitiɓe. Yejjite noon ko yimɓe aarnooɓe e o aduna sabu tan haarde e harannde. Aan a wona jejjitteɗo sabu a ligganima Alla (SWT) e Nelaaɗo Alla (SAW) e Seek Ahmet Tijjani Serif (Rta) e Ceerno Allaji Mohammadu Saydu Ba (Rta) e Ceerno Ahmadu Tijjani Bah (Rta) e dentalngal e julɓe fof.

      E golle ma, mi jaŋngi heen wonde, julɗo ene foti, e o aduna, ligganade lislam, e leñol mum sabu addi en ɗo e o aduna ko misiyo mo gollaten, mo moni kala e men nawndoyte jaŋngo.

Ko goonga! Aduna ko laana taccirteeka kono hay goto duumata e maggal.

Aliw KUME, amudo dental Madiina Gunaas

Winnda ko Ndakaaru e ñalawma altine 02 silto 2019