DAAKAA KO HEƁOTOO HEEN KOO HAALOTAAKO NGAREE NJEHEN DAAKAAA (ALH. ABUU NJAAY)

Ndeeɗoo lulnde Alliyaŋkoore dewal Alla tan fuɗɗiinde e hitaande 1942 tawi fuɗɗi ɗum ko jiyaaɗo Alla mo Alla moƴƴini geɗe mum, woni Ceerno Alh Muhammadu Saydu Bah. Yoo weluya Alla won e makko.

Ndeeɗoo lulnde Alliyaŋkoore Koko yonti haŋkadi ɓaydi ko 14 haa 23 Mars 2020. Tawi ko no aadorii nii tan ; ko to ladde, kilooji 10 hakkunde mum e wuro sunna ngoo, Madiina Gunaas. Tawi ko worɓe meeɓe tawi debbo jillaani fodde balɗe 10 dewal Alla.

Ɓeen noddaaɓe ine njogori nootoyaade yoo peewnitano ɗum to laaɓal timmungal e golle baɗoyteeɗe ɗee, jaŋngude Alquraana, Sayfiyyu, Hizbul bahri, kam e Salaatul Faatihi. Yimɓe fof poti ɗoon e peeñdi, kono ɓuraaɗo kay ine anndi. Joom martaba toowɗo to Alla e baŋngeeji kala. Joom martaba e aduna e fannuuji mum kala, moni kala e Daakaa e sifaa oo ko gooto; so hoɗde e huɗo e leɗɗe, so toowii e les baasuuji. Tawi noo to hoɗorde mum, ko etasuuji e kuɓeeje toowɗe, cuuɗi ɓuuɓnaaɗi, bertaaɗi haa ɗaati. Kono kala garɗo gootol, so hootii artat kadi addorat. Ko noon Alla rokkiri Daakaa.

Keewal yimɓe yondiniiɓe, fadɓe e ballal Alla joomiraaɗo subhaanahuu wata aalaa, jogiiɗo, baawɗo, mawɗo oo. So ndee lulnde yontii, moƴƴuɓe e laamɓe ine mbaɗda adaa e makko. Etee hawrata ko e sahaa nguleeki kono a tinataa ɗum e maɓɓe. Waktuuji ɗii joy juuleteeɗi e Dental. Eskey ko Daakaa koo ! Sappeeji jooɗɗi, poocciiɗi, dariiɗi, laaɓɗi, laaɓtuɗi, kufunaaji e dow koye, kurusaaji ejuuɗe... eskey ko Daakaa !

"Ladde wontii wuro!" ko noon jimoowo oo wiynoo. Ɗuum tigi gooŋɗi. Jookli nay winndere ine nootoo e Daakaa, ngaddora ko wuurata ɗumen e ɗeen balɗe. Aan garoowo Daakaa anndu moƴƴere ine heɓoo e Daakaa soko ɗuum addumaa kay. Reento lorde, tampinde, ɓittinde, saka tooñde garɗo Daakaa. Dental so heewii, anniyaaji keewa. Aan jogiiɗo Anniya moƴƴo e Daakaa a malaama sabu aheɓat haa timma rufa e ɓesngu e banndiraaɓe.

Daakaa ine añi Simme saka cimmotooɗo e Daakaa, alaa ko haali leƴƴi goɗɗi bonnooji hakkille neɗɗo, ɗuum soklaaka e Daakaa. Arduɓe Alla, ɗaɓɓooɓe Alla yiilotooɓe Alla, ko ɓeen njeyi Daakaa.

Yurmotooɓe, wallooɓe, reentinooɓe, waajotooɓe, ɓamtooɓe diine Alla e Tijjaaniya ine ndeerɗaa e Daakaa. Aan garoowo Daakaa ardu e tinnaare ɓernde laaɓnde keɓaa, ndañaa ko heɓetee e Daakaa. Ko siftinde tan e wallitde sabu Daakaa ko moƴƴere tan yiyaa e mum.

Gila noon e hitaande 1980, nde Ceerno mawɗo fooftoyii, Alla totti gardagol ngol Ceerno Alh Aamadu Tijjaani Bah e mawniraaɓe mum: Ceerno Muhammadul Mansuur Baro e Ceerno Alh Usmaan Caam yoo weleede Alla won e maɓɓe... e miñiiko en: Ceerno Abdul Ajiij Ceerno, ballunooɗo gooŋɗuɗo ɓe ndarodii ɓe mballondiri haa aduna oo kala faami anndi darnde maɓɓe e wallude dental ngal yoo Alla ɓuuɓanɓe e ko nanndi e maɓɓe. Hannde oo aɗum heddii e juuɗe Ceerno Alh Aamadu Tijjaani Bah e miñiraaɓe mum Ceerno Ibun Umaar Ceerno, Ceerno Sheek Baro e denndaangal ɓesnguuji maɓɓe. To Cilon, to Faas Gunaas, to Madiina Alhajji, to Boyinnaaji, to Ngijilon e nokkuuji goɗɗi ballitooji dental ngal.

Hannde aduna oo fof anndii ko Madiina Gunaas koo ko goonga, ine laaɓi e nder sunna annabi oo (S.a.s)

Daakaa, noddaandu Alla e Nelaaɗo mum s.a.w. Kala mo Alla moƴƴani e tawtoreede ɗum, o dañii te fanndinii moƴƴere humtoore haajuuji e aduna, daɗndoore caɗeele e laakara. En nduwaniima wonɓe e heblanaade ngam arde daakaa yoo Alla addu on e jam. Ngaron e jam, tawon jam, ngollon golle ɗee e jam, kooton e jam ! Aamiin Aamiin !

Daakaa jooɗotoo ko Aset 14 Mars 2020.

Alh Abuu NJAAY, Funeere Kumpital

Hooreejo Saaktirde Daakaafm to Madiina Gunaas