DOONDU: Ziyaara Ceerno Tapsiir Paam (Rta) waɗi e keewal julɓe

Ziyaara hitaande 2019 mo Ceerno Tapsiir Mammadu Umar Paam (Rta) waɗi ñande 18 e 19 silto to wuro Doondu falnde Maatam.

Doondu jaɓɓima julɓe heewɓe taw ala ko addiɓe so wona tawtoreede ziyaara wuliyu Allah hono Ceerno Tapsiir Paam (Rta). Ziyaara o fudɗi ko ñande jamma 18 silto taw ko hiirde diineyaŋkore mawnde e keewendi almuɓɓe ŋuraan.

Ñalawma mawɗo o noon woni 19 silto udditira ko e jaŋngugol deftere ŋuraan nde. Caggal mum adaduuji keewɗi ɓaɗa. Hono no wowirno e hitaande kala, seeremɓe mawɓe tawtorama hikka. Eɓen seeremɓe ene jeya hen, Ceerno Faadel Aan (Rta) mo Ngijiloon, taaniraaɓe Seek Tijjan Serif (Rta), nelaaɗo Ceerno Yero Ɓan (Rta) to Dakar, en njejjitta sete gure saraajiɗi.

Caggal calminaali ceniiɗi faade e julɓe ɓe, Ceerno Yahya Bokar Gey bismi hoɓɓe ɓe e kuuɓal. Ceerno Faadel Aan (Rta) arti e gilli gonɗi hakku galle Ceerno Aliw Ceerno Yero Baal (Rta) e doondunaaɓe; e kaŋko hore makko e dondunaaɓe. O seedima ko moƴƴi e jom ziyaara o, Ceerno Tapsiir Paam (Rta).

Heewɓe e tawtoraaɓe ɓe ceedima e alliyaŋkagal Ceerno Tapsiir Paam (Rta). E siftinde, Ceerno Tapsiir ene jeyano e lodnooɓe Ceerno Ahmadu Baro (Rta) mo Mbuur caggal nde o rutti e joomiraaɗo.

E timminde golle ɗe, duwawuuji jam e kisal mbaɗa. Yimɓe ndokkondiri aadi hitaande 2020 faande, so Allah jaɓi.